Kamjenica (dpa/SN). Slědźer na polu ekstremizma Tom Thieme ma pokazki na to, zo so wobchadźenje z prawicarskim ekstremizmom w Sakskej poněčim měnja. „Zamjelčenje a złahodnjenje bě dołhi čas linija krajneho knježerstwa. Při tym njeńdźeše ani wo sympatiju za ekstremne pozicije prawicarjow. Zamołwići so starosćachu, zo móhła nahladnosć kraja ćerpjeć, w kotrymž je po zdaću wšitko w porjadku.“ Tele rjekny polito­loga Kamjeničanskeje techniskeje uniwersity powěsćerni dpa. Knježacy nochcychu „žane brune blaki na ach tak běłym sakskim lacu“.

Nastajenje je so mjeztym změniło. Njeskutki prawicarskoekstremistiskeje skupiny NSU, kóždolětne pochodowanje neonacijow 13. februara w Drježdźanach, ale tež přećiwo islamej a wukrajnikam měrjace so hibanje Pegida a demonstracije w zwisku z krizu ćěkancow su kraj nuzowali poziciju zabrać. „Z prawom su ministerski prezident Stanisław Tilich (CDU) a dalši politikarjo koalicije nětko jasne słowa zwuraznili.“

Druhdy su wobrazy tak hnujace, zo poprawom žadyn tekst njetrjebaš. Takle to bě, jako­ widźachmy foto mortweho syriskeho hólčka na turkowskim pobrjohu, kiž bě so na jězbje přez Srjedźne morjo zatepił. Po­dobnje je to z hólcom w syriskim Aleppje, kiž sedźi zranjeny a próšny w chorobnym awće. Foto je runjewon symbol surowosće a bjezzmyslnosće wójny, pod kotrejž w prěnim rjedźe ciwilisća ćerpja. Wšojedne, kak tale wójna wuńdźe: Wobrazy mrějacych a ćerpjacych ciwilistow su so kruće do pomjatka čłowjestwa zaryli. Wone zdobom dokumentuja, kajku winu wšitcy „akterojo“ wójny na so bjeru – hač w Damaskusu, Washingtonje, Ankarje a bohužel tež w Moskwje. Poskitk Ruskeje, dwaj dnjej wob tydźeń „wójnsku přestawku“ zapołožić, problem njerozrisa. Krawny konflikt w Syriskej drje hišće dołho traje, dokelž njeje nichtó k woprawdźitym kompromisam zwólniwy. Marko Wjeńka

Wopačneho kupca wupytali su sej paduši paketow. Woni poskićichu wjacore antikske pjenjezy runje tomu wikowarjej w Tübingenje, kiž bě twjerde pjenjezy dny do toho z póštu wotpósłał. Tón pjenjezy hnydom spózna a zawoła policiju. Ta je třoch muži w starobje dwaceći, 31 a 37 lět hnydom sobu wzała. Jako­ sub-předewzaćeljo transportowachu woni pakety pósta, při čimž stajnje zaso drohotne wěcy z nich kradnychu.

Jastwowemu stražnikej žiwjenje wuchowali su jeći jastwa w Texasu: Ze swojeje cele běchu woni wobkedźbowali, kak so stražnik infarkta wutroby dla zwjeze. Na to z pjasćemi wo durje bijachu, zo bychu­ tamnych stražnikow na so skedźbnili. Jako so to njeporadźi, zhromadnje durje cele přełamachu a pomoc přiwo­łachu. Widejokamera je dobry skutk dokumentowała.

Bywši zapósłanc Sakskeho krajneho sejma Wolfgang Marcus (SPD) je 9. awgusta 88lětny w badensko-württembergskim Weingartenje zemrěł. Narodźił bě so wón 15. oktobra 1927 w Zhorjelcu. Po Druhej swětowej wójnje bě sobuzałožer CDU a Młodeje unije w Sakskej. Lěta 1946 dyrbješe katolik do zapadneje Němskeje ćeknyć, hdźež dźěłaše jako wysokošulski wučer. Wot 1970tych lět angažowaše so jako čłon SPD w komunalnej politice.

Po towaršnostnym přewróće w NDR přisłušeše wot 1990 do 1994 Sakskemu krajnemu sejmej. Hač do smjerće bě wón w kubłanskej, medijowej, cyrkwinskej a mjeńšinowej politice Sakskeje a Badensko-Württembergskeje mnohostronsce aktiwny.