Na knižnu premjeru w Budyšinje
Nowa antologija serbskeje prozy „Mlóče“ je wotnětka w krutej wjazbje na předań. Mjez dwaceći awtorami je młode pjero runje tak sylnje zastupjene kaž starše. Knižna premjera ze zjawnym čitanjom budźe jutře, štwórtk, w Budyskej Smolerjec kniharni.
Budyšin (SN/bn). Nowa zběrka powědančkow „Mlóče“, wušła w Ludowym nakładnistwje Domowina, budźe jutře wječor w Budyskej Smolarjec kniharni předstajena. Cyłkownje dwaceći pisacych je w njej zastupjenych, mjez nimi Beno Budar, Jěwa-Marja Čornakec, Benedikt Dyrlich, Jurij Koch, Měrana Cušcyna, Křesćan Krawc. Monika Dyrlichowa, Alfons Wićaz, Dušan Hajduk-Veljković, Měrka Mětowa, Dorothea Šołćina a Róža Domašcyna. Njewočakowano je zběrka zdobom tež rozžohnowanje z jednym z najproduktiwnišich a najwliwapołnišich serbskich tworićelow Kitom Lorencom, kiž je njedźelu na prawdu Božu wotešoł.
Chórowa hudźba w nimale intimnym ramiku
Budyšin (SN/bn). Na žurli Budyskeho Serbskeho muzeja zaklinčachu minjeny pjatk wječor „Mišterske twórby chóroweje hudźby“. Pod nawodom Andreasa Pabsta zanjese chór Serbskeho ludoweho ansambla kompozicije ze štyrjoch lětstotkow.
„Ubi caritas“ Mauricea Durufléja, zaspěwane za chribjetom připosłucharjow, tworješe zazběh prěnjeho dźěla koncerta, w kotrymž přeswědči chór z duchownymi twórbami baroka, romantiki a ekspresionizma. „Credo“ z „Božeje mšě za dwójny chór“ Franka Martina bě wjeršk. Byrnjež kruch za znajmjeńša 80 sobuskutkowacych koncipowany był, su spěwarki a spěwarjo přewšo naročnu partituru kedźbyhódnje zmištrowali, byrnjež w přednošku snano trochu přespěšnje.
Dyrlich w Bani Luce čitał
Wo knihach a kniharni (22.09.17)
„Wotpočink njeje žadyn čłowjeski mordar.“ Tale zajimawa sada steji w nowej knize Pawoła Roty „Z kameru a pisakom po Delanach“, kotraž je njedawno w Ludowym nakładnistwje Domowina wušła. A woprawdźe – zajimawy wotpočink ći lektura spodobneho wudaća bjezdwěla wobradźa. Sym sej wěsta, zo nadeńdźe nowostka mnoho čitarjow, kotřiž budu nic naposledk zwjeseleni z krasneje a přewšo bohateje rěče Pawoła Roty. Tak so pola njeho „njebjo wowckuje, doniž njeje widźeć, kak mróčele wodu woža“. Nó tak, je to prawy čas, w knihach lěhać.
Wuhotowarjo akciskeho tydźenja spokojom
Budyšin (SN/bn). Akciski tydźeń přećiwo zabyću „Zhromadnje město sam“ je so minjenu sobotu z „wopominanskim wuchodźowanjom“ zakónčił. Mjez angažowanymi towarstwami a iniciatiwami běštej wosebje młodźinskej organizaciji SPD a Lěwicy za přewjedźenje akciskeho tydźenja zamołwitej.
„Cyłkownje smy jara spokojom z wotběhom a rezonancu“, měni Bruno Rössel, předsyda łužiskeje lěwicarskeje młodźiny solid. „Předewšěm zawodnej zarjadowani spočatk tydźenja běštej wuspěšnej. Wulki zajim wosebje młodźiny za europske temy a dobre rozmołwy su mje póndźelu wosobinsce jara zwjeselili. Wutorne zhromadne interkulturne warjenje je tójšto pasantow přiwabiło, štož běše cyle w našim zmysle. Při jědźi sej dźě cyle hinak mysle wuměnješ hač w formalnym ramiku. Přewažnje přihłosowacu wotewrjenosć našim ćežišćam napřećo tohorunja pozitiwnje hódnoću.“
Wulkotny wuhlad z powjaznicy na stolicu
Mjezynarodnu zahrodnu přehladku w Berlinje wopytał
Hač do 15. oktobra hišće je Mjezynarodna zahrodna přehladka (IGA) w Berlinje přistupna. Podawk to, kotryž so jenož kóžde dźesać lět wotměwa, Zwjazkowa zahrodna přehladka (BUGA) porno tomu kóžde druhe lěto. Tohodla njech je na tymle městnje hišće raz na to skedźbnjene. Snano so tón abo tamny přichodne dny tola hišće rozsudźi sej wustajeńcu w stolicy wobhladać. Za to tule někotre wužitne pokiwy:
Za měšćansku štwórć Marzahn-Hellersdorf ma zahrodna přehladka wulki wuznam. Jako so Berlinski senat město Tegela mjez druhim masiwnych wobydlerskich protestow dla za nowotwarsku štwórć na wuchodźe Berlina rozsudźi, bě to dosć chrobłe. Zwostachu mjenujcy jenož hišće tři lěta, zwoprawdźić projekt IGA. Bě mudre, „Zahrody swěta“, wotewrjene 1987 składnostnje 750. róčnicy Berlina, jako centralne městno přehladki zapołožić a z Kienbergom a Wuhletalom powjetšić na dobre 104 hektary, štož wotpowěduje 140 koparskim hrajnišćam.
„Sława“ w najwjetšej Choćebuskej cyrkwi
Chóraj Serbskeho ludoweho ansambla a Łužyca stej přewšo krasny koncert wuhotowałoj. Nimo serbskich zaklinčachu w Choćebuskej Němskej cyrkwi tež němske a mjezynarodne, přewažnje słowjanske twórby wokalneje hudźby ze štyrjoch dobow.
Choćebuz (HA/SN). Něhdźe sto zahorjenych připosłucharjow je njedźelu popołdnju w Choćebuskej Němskej cyrkwi krasny chórowy koncert dožiwiło. Pod nadpismom „Wokalna hudźba přez lětstotki“ su spěwarki a spěwarjo Serbskeho ludoweho ansambla a tuchwilu najwuspěšnišeho delnjołužiskeho chóra Łužyca wopytowarjow z twórbami serbskeje, němskeje a mjezynarodneje literatury ze štyrjoch epochow hudźbnych stawiznow zahorili.
Zaso wuzwoleny
Berlin (SN/bn). Serbski komponist a organist Sebastian Elikowski-Winkler je dale předsyda Berlinskeho towarstwa Iniciatiwa nowa hudźba inm. W lěće 1991 jako kulturnopolitiski forum załožena organizacija je třěšny zwjazk akterow našočasneje hudźby w zwjazkowej stolicy a zastupuje jich w dialogu ze senatom, wobwodami a zarjadnistwom. Iniciatiwa skutkuje dźensa jako spěchowanska institucija a je jako tajka wažny dźěl kulturneho žiwjenja w Berlinje. „Buch z wjetšinu na dalšej lěće wuzwoleny“, rozłožuje Elikowski-Winkler. „W swojej funkciji sym k tomu zdobom čłon rěčnikow ,Koalicije swobodneje sceny‘ kaž tež ,Hudźbneje třěchi DACH‘ w Berlinje.“
„DACH“ je forum swobodnych, institucionelnje njewjazanych hudźbnikow, angažowacy so na polu jazza, noweje kaž tež stareje hudźby a našočasneho hudźbneho dźiwadła.
„Koalicija swobodneje sceny“ je lěta 2012 załoženy njewotwisny zajimowy zwjazk, kotryž sparty a žanry překročejo na „eklatantnje wopačne wuwiće kulturneho etata“ němskeje stolicy Berlina reaguje, kaž Elikowski-Winkler měni.
Njeboja so wužadanjow
K zakónčenju sezony duchowneje hudźby wuhotuje katolski tachantski chór pod nawodom cyrkwinskeho hudźbneho direktora Friedemanna Böhmy stajnje koncert, pak pod wosebitej tematiku pak z wobšěrnym oratorijom. Minjenu njedźelu rěkaše wosebity poskitk „Magnifikat“.
Budyšin (CRM/SN). „Cyła wosobina Marije so w tymle chwalospěwje wotbłyšćuje. Wón je takrjec wobraz maćerje Božeje“, rozłoži tachantski farar, prelat Wito Sćapan, poćahowacy so na słowa Benedikta XVI. z lěta 2005. „Magnifikat“ spěwaja tež katolscy Serbja nimale na kóždym nyšporje. Chwalospěw Marije pak komponuja wuměłcy hižo přez lětstotki tohorunja do wšelakich formow. Tak sćěhowaše tež sobu najpopularniši cyrkwinski komponist našich dnjow w Jendźelskej John Rutter (nar. 1945) dołhu tradiciju, słowa chwalby Boha wuměłsce z hudźbu zwjazać. Při tym da so inspirować wot „wjesołych marijanskich swjedźenjow we łaćonskoameriskich kulturach“. Wosebitosć tohole stila začuwachu připosłucharjo tež nětko w Budyšinje.
Akciski tydźeń zakónčeny
Z podijowej diskusiju k naprawam a wopomnjenskim wuchodźowanjom
Budyšin (SN/bn). We wobłuku akciskeho tydźenja „Zhromadnje město sam“, w běhu kotrehož su so Budyšenjo z lońšimi podawkami na Žitnych wikach rozestajeli, přeprosychu akciju organizowacej stronskej młodźinje SPD a Lěwicy kaž tež Budyske spěchowanske towarstwo Pro Museo minjeny štwórtk na podijowu diskusiju do Budyskeho muzeja. Temowe ćežišća běchu prašenja, kak móhła so integracija ćěkancow w sprjewinym měsće poradźić, hač běchu překročenja w minjenym lěće wuwzaće a hač ma Budyšin problemy z prawicarjemi. Wobdźělnicy foruma běchu Budyski wyši měšćanosta Alexander Ahrens (SPD), zapósłanča zwjazkoweho sejma Caren Lay (Lěwica) kaž tež čłonaj měšćanskeje rady Roland Fleischer (SPD) a Elisabeth Hauswald (CDU).
