Praha/Drježdźany (Łu/SN). W rumnosćach zastupnistwa Swobodneho stata Sakskeje w Praskim Serbskim seminarje su wutoru přehladku molerja Tomášeka Ticheho zakónčili a zdobom zahajichu tam nowu dobu kulturnych stykow a wzaj­omneho dźěła mjez sakskim běrowom a čěskimi přećelemi Serbow.

Z finisažu zakónčichu wustajeńcu mólbow Tomášeka Ticheho. „Młody čěski wuměłc zastupuje figuralne molerstwo a je ze swojim tworjenjom tež chětro wuspěšny, kaž to přehladka jeho mólbow nazornje pokazuje“, rjekny nawoda Sakskeho kontaktneho běrowa w Praze dr. David Michel. Nimo wustajeńcow w Čěskej a Němskej bě Tichy tež hižo w Londonje a Florencu swoje wuměłske wudźěłki předstajał.