Bratislava/Budyšin (SN). Zastupjerjo 13 narodnych wědomostnych akademijow su so njedawno w Małych Karpatach blisko Bratislavy wo wudaću dalšich zwjazkow Słowjanskeho rěčneho atlasa dorozumili. Budyski Serbski institut zastupowaštaj dr. Sonja Wölkowa a Tomaš Mencl.

Mjezynarodna komisija rozjimowaše nimo wědomostnych tež wšelakore techniske prašenja nastupace kompjuterowe wobdźěłanje rěčneho materiala. Wjacori wobdźělnicy předstajichu swoje najnowše publikacije z wobłuka slawistiskeho dialektneho slědźenja. Na projekće atlasa wobdźěleni wědomostnicy zaběraja so tuchwilu z tym, zjednotnić, rjadować a kartografować wotmołwy na 3 500 prašenjow naprašnika, kotrež su slědźerjo na něhdźe 830 wuzwolenych městnach zezběrali. „To je wulki organizatoriski wukon, na kotrymž je 13 narodnych wědomostnych akademijow wobdźělene, mjez nimi tež Serbski institut“, informuje dr. Wölkowa.