Něšto mjenje wobdźělnikow na literarnym wubědźowanju
Budyšin (SN/CoR). Kóžde druhe lěto je tak daloko a dorost je namołwjeny, swoju fantaziju wuwiwać, sej stawiznički wumyslić, swoje mysle a začuća do kompaktneje abo tež wobšěrnišeje rěčneje formy přinjesć, je napisać a so z wuslědkom na literarnym wubědźowanju wobdźělić. Lětsa w juniju stej je Ludowe nakładnistwo Domowina a Załožba za serbski lud 21. raz zhromadnje wupisałoj, zo bychu młodźi zajimcy tež přez lětnje a nazymske prózdniny chwile k pisanju měli. 30. oktober bě posledni termin zapodaća twórbow, nětko maja so zarjadowarjo prócować a so ze snano tež prěnimi literarnymi pospytami hišće njewotkrytych talentow abo tež hižo tróšku dalewuwitych w starobje hač do 35 lět rozestajeć.
