Elektroniska hudźba we fokusu předewzaća ze serbskimi korjenjemi

Berlin (SN/bn). „Takatak records“ rěka nowy Berlinski label a je spočatk decembra dźěłać započał. Prěnja z dotal třoch tačelow, kotrež je we formje towaršnosće byrgarskeho prawa organizowane předewzaće mjeztym wudało, je „artificial music 01“, analogny debit serbskeho hudźbneho projekta „matotam“. Za nim chowa so tuchwilu w Greifswaldźe skutkowacy wuměłc Mato Nawka, kiž bě swoje twórby dotal jeničce digitalnje na swojej interaktiwnej internetnej stronje prezentował. Na sto eksemplarow limitěrowany winyl je mjez druhim w Budyskej Smolerjec kniharni na předań a skići přehlad šěsć z cyłkownje dwanaće albumow hudźbnika. Tačel wobsahuje nimo toho kode za download remasterowanych titulow we formaće mp3.