Rozmołwa z wjesnjanostu delnjołužiskeje gmejny Hochoza
Dwurěčna delnjołužiska gmejna Hochoza z 850 wobydlerjemi je ze serbskej kulturu wusce zwjazana. Wo to stara so tež 77lětny wjesnjanosta Fryco Wojto. Alfons Wićaz je so z nim rozmołwjał.
Sće hižo 25. lěto wjesnjanosta. Što Wam to woznamjenja?
F. Wojto: Mi je wažne, zo staraš so jako wjesnjanosta we wšitkich wobłukach wo zajimy wobydlerjow cyłeje gmejny a zo sy přeco k dispoziciji. Wjesnjanosta dyrbi wšudźe přitomny być.
Sće so w Hochozy narodźił, wuznawaće so jako Delnjoserb a maćeršćinu wšědnje nałožujeće. Kak pak wupada ze serbskosću we wsy?
F. Wojto: Haj, sym tu dwurěčnje wotrostł. Staršej kaž tež dźěd a wowka su serbsce rěčeli. Sym sej swoju maćeršćinu wot nich přiswojił. Dokelž pak staj staršej wjele negatiwneho w žiwjenju nazhoniłoj – dóstaštaj sej w šuli puki, hdyž serbowaštaj –, staj ze mnu němsce rěčałoj. Dokelž pak dźěd a wowka němsce njemóžeštaj, narěčeštaj mje serbsce. Ja wšak počach hakle pozdźišo serbować.
