Wuměłcy z třoch kontinentow 18. folklornu lawinu wobohaćili
Lubnjow/Bórkowy (mih/SN/bn). Dohromady wjace hač 300 wuměłcow z cyłkownje 15 krajow je minjeny kónc tydźenja wopytowarjow 18. mjezynarodneje folklorneje lawiny w Lubnjowje, Bórkowach a Starej Darbni zahoriło. Wjetšina skupin je na kóždym z třoch dnjow publikumej dohlad do swojeje ludoweje kultury poskićiła.
Mjez mnohimi wjerškami wukopaštej so wosebje šotiski ansambl North Berwick Pipe Band & Dunedin Dance Academy a baskiski cyłk Edurre Euskal Dantza Taldea jako přihladowarjow zabawjacej magnetaj. Šotojo pokazachu skerje tradicionalny program, w kotrymž dudy a kilty wulku rólu hraja. Najwjace přikleska pak zasłuži sej dorost za swoju dokładnje choreografowanu reju. Baskojo předstajichu so tohorunja w narodnej drasće, ale bjez instrumentow. Za přehlad swojich pochodow a (přewažnje) kročatych rejow běchu woni tójšto rekwizitow kaž kije a mječe sobu přinjesli. A zo so podłu Pyrenejow podobnje kaž pola nas za bantami rejuje, wo tym móžachu so zajimcy tohorunja přeswědčić.
