Wustajeja archeologiske objekty a archeotechniske rekonstrukcije

Budyšin (SN/bn). „Chcemy k tomu pohnuwać, zo wopytowarjo wo swojich korjenjach rozmysluja“, zjimaše kuratorka za kulturne stawizny a literaturu Budyskeho Serbskeho muzeja Andrea Pawlikowa na wčerawšej nowinarskej konferency hłowny wotmysł noweje wosebiteje wustajeńcy „Stary lud – Ze žiwjenja Łužičanow a Milčanow“. Pětš Kornelius Kuš ze spěchowanskeho towarstwa Domizniskeho muzeja Dešno doda: „Zaměr přehladki tež je słowjansko-serbski srjedźowěk tak pokazać, zo móža so hosćo do stawiznow zanurić a je zrozumić.“ Muzej a towarstwo stej wustajeńcu zhromadnje koncipowałoj a zarjadowałoj. W prěnim dźělu wěnuja so Dešnjenjo technologijam a rjemjesłam we Łužicy 7. do 12. lětstotka. Přez lěta sej je přiswojejo su na přikład drastu, brónje a sudobja rekonstruowali. Njewšědne maćizny kaž jantar swědča runje tak wo zažnym wikowanju kaž tehdy jako změna wužiwane tak mjenowane rubane slěbro. Druha rumnosć napodobnja typiske bydlenje srjedźowěka a je tohorunja rekonstrukcija.