Chronikarjo sej slědźerske nazhonjenja wuměnjeli

Žuricy (aha/SN). Kóždolětnje přeproša Kamjenska župa „Michał Hórnik“ wjesnych chronikarjow na wuměnu aktualnych slědźenjow. Na wčerawše zetkanje w galeriji rězbarja Alojsa Šołty w Žuricach bě wot 24 přeprošenych něhdźe połojca z nich ze wsow wot Konjec hač do Jawory přišła. Prěni raz wobdźěli so Achim Šołta z Hory.

K zazběhej wuradźowanja wodźeše Alojs Šołta chronikarjow po swojej wustajeńcy z rězbarskimi wudźěłkami. Jeho přewažnje z korjenjow rězbarjene eksponaty su z jednoho krucha. Wuměłc trjeba tuž dobre wóčko, hdyž za kmanymi korjenjemi pyta. Stajnje staja wobličo a postawu čłowjeka do srjedźišća swojich twórbow. Cyle hnujace a aktualne je jeho dźěło, hdźež widźiš na dołhim, čołmej podobnym korjenju, wulku syłu migrantow: dorosćenych a dźěći. Z wuměłskej wušiknosću rězbarjene twórby wotbłyšćuja, zo zamóže Žuričan mortwe drjewo k žiwjenju zbudźić.