Z rekordom do noweho lěta Empfehlung

Montag, 07. Januar 2019
Artikel bewerten
(0 Stimmen)

Cyłkownje mjenje, přerěznje pak wjace wopytowarjow w NSLDź

Budyšin (SN/bn). Němsko-Serbske ludowe dźiwadło je hladajo na wopytowarstwo a jeho wothłós ze zašłym lětom dosć spokojom. Byrnjež ličba přihladowarjow porno lětu 2017 wo něhdźe 1 200 woteběrała, woznamjenja dohromady 154 000 hosći dobry wuslědk. Tež mnóstwo předstajenjow bě trochu mjeńše, město 961 zarjadowanjow wuhotowachu 876, štož wšak je přeco hišće nimale połtřeća na dźeń. W adiciji pak to tež rěka, zo je sej přerěznje 175 ludźi a tak statistisce štyrnaće wjace hač lěto do toho jednotliwe předstajenja wobhladało.

Najwjetši bě zajim na lětnim dźiwadle pod hołym njebjom. Wospjet je so spektakl z nowym wopytowarskim rekordom skónčił, dokładnje 40 263 přihladowarjow je inscenaciju „Olsenowa cwólba wotzběhnje“ dožiwiło. Třeći a drje posledni dyrdomdej woblubowaneje danskeje trójki ganowow pokazachu cyłkownje 35 króć. Wosebity jubilej swjećeštej repertoirnej produkciji „Budyska balada“ na tekst Michała Lorenca a hudźbna bajka klankodźiwadła „Pětr a wjelk“, kotrejž su 150. resp. 350. raz pokazali.

Mjez dohromady 26 premjerami bě zaso pjeć hornjoserbskich produkcijow. Na hłownym jewišću předstajichu profesionalni dźiwadźelnicy zhromadnje ze skupinu lajkow hru „Paradiz w dobrej stwě“, kotraž je cyłkownje 1 061 přihladowarjow přiwabiła. Čłonojo Młodźinskeho dźiwadła Serbskeho gymnazija Budyšin zahorichu publikum z eksperimentalnym kruchom na zakładźe improwizacije „Kupa fantazije“. Prěni raz běštaj šulerkam a šulerjam hóstnaj hrajerjej afghaniskeho pochada poboku.

Inscenaciju „Čmjeła Hana chce pomhać“, kotruž dožiwi 2 000 zajimcow, pokazachu ducy po Łužicy kaž tež trójce w kulturnej stolicy Europy Ljouwert (nižozemsce: Leeuwarden). Z prapremjernje předstajenej produkciju „Kito husličkar“ bě NSLDź w našim regionje kaž tež w Radebeulu a Praze z hosćom. Hornjoserbsku wersiju hry Jurja Kocha „Sergej“ wopyta na dźewjeć předstajenjach 420 ludźi. Rjad „Studijo hraje“ njehodźeše so loni schorjenja dla dale wjesć.

W Delnjej Łužicy prezentowachu dramu „Wjelika wutšoba“ cyłkownje štyri razy, mjez druhim prěni króć w Grodku.

Nimo mjenowanych premjerow pokaza NSLDź repertoirne dwu- resp. trojorěčne kruchi „Zgubjone a namakane“, „Ferkel, hunčo a prosetko“ a „Abejcej“. Kontrowersu wuwabiła je zhromadna performance z Lipšćanskej skupinu friendly fire „Muzej Němcow“.

Lětsa planuja składnostnje 70. róčnicy załoženja serbskeho powołanskeho jewišća mjez druhim prapremjeru „Wopušćeny dom“ – hra Carle Niewöhner bu we wobłuku wubědźowanja „ŁUŽICY 2017“ ze spěchowanskim mytom wuznamjenjena – na hłownym jewišću a kruch „Njeplecne pśewześe“. Serbske dźěćace dźiwadło NSLDź přihotuje bajkowu hru „Mały Muk“.

Veröffentlicht in Kultura
Bitte anmelden, um einen Kommentar zu posten

Anzeige