Budyšin (SN/BŠe). Wosebitu překwapjenku dožiwichu wčera ludźo w Budyskim Centeru na Žitnych wikach, hdźež zaklinčachu wokoło připołdnja naraz serbske zynki. Něhdźe 30 sobudźěłaćerjow serbskich institucijow a dalši zajimcy zanjesechu tam bjez připowědźenja spěw „Ha, pisane su sanki“. Na akordeonje přewodźał je jich Tasso Schille.

Ideju za tak mjenowany flashmob – krótki a spontany wustup skupiny ludźi na zjawnych městnach, při čimž so wobdźělnicy druhdy samo njeznaja, ale zhromadnje njewšědne wěcy činja – měje­še marketingowy wotrjad Załožby za Serbski lud. „Chcychmy wobydlerjam a hosćom Budyšina serbski postrow z Łužicy sposrědkować a na dwurěčnu kónčinu skedźbnić“, wuswětli zamołwita za marketing a kooperacije pola załožby Hanka Budarjowa, kotraž móhła sej samo předstajić, dalše tajke překwapjace podawki wotměć.