Budyšin (SN/bn). „Serbske žiwjenje na kraju“ rěka pućowaca wustajeńca historiskich fotografijow, kotruž je rodźeny Choćebužan a sobudźěłaćer Ludoweho nakładnistwa Domowina Heiko Lobert ze swójskeje zběrki zestajał. Wotnětka je hač do kónca měrca w Budyskej Serbskej kulturnej informaciji přistupna.
Dohromady 28 zdźěla sylnje powjetšene reprodukcije pokazaja přewažnje wjesne žiwjenje, swjedźenje a nałožki zapadnje Choćebuza. Najstarši wobraz bě wokoło lěta 1910 nastał, najmłódši něhdźe 1980. Wjetšina fotografijow pak wotbłyšćuje 1920te a 1930te lěta, při čimž njehodźa so wšitke eksponaty jasnje datěrować. Portretowane wosoby – žony nimale stajnje w serbskej narodnej drasće – su wobydlerjo mjez druhim Putgóle, Kokrjowa a Cazowa kaž tež hižo wjace njeeksistowaceje wsy Tšawnicy. W tym zwisku najskerje najbóle jimacy je motiw, pokazowacy muža, kiž husy pase a w pozadku brunicowy bager.
Witriny chowaja tójšto originalnych fotow. Wosebje napadny je prawdźepodobnje w Francoskej nastaty wobraz młodeju Serbowkow z młodźatkom lawa.