Swětowy dźeń šulerskeho dźiwadła znowa tysacy přihladowarjow wabił
Budyšin (SN/bn). Němsko-Serbske ludowe dźiwadło Budyšin je mjeztym 20. swětowy dźeń šulerskeho dźiwadła wuhotowało. Po słowach za zarjadowanje zamołwiteje dźiwadłoweje pedagogowki Heidy-Simony Bartoweje „najwjetše zetkanje lajskich cyłkow w Němskej“ je wčera w Budyšinje něhdźe 5 000 zajimcow přiwabiło. Na 14 hrajnišćach po cyłym měsće předstaji dohromady wjace hač 900 łužiskich šulerkow a šulerjow w starobje wosom do 18 lět cyłkownje 45 programow. Kmótřistwo přewzał bě lětsa krajny rada Budyskeho wokrjesa Michael Harig (CDU).
