Oratorij „Israelowa zrudoba a tróšt“ po 25 lětach znowa předstajeny
Chrósćicy/Drježdźany (SN/JaW). Jara spokojne mjezwoča mjez wopytowarjemi runje tak kaž mjez akterami a wšitkimi dalšimi pomocnikami – to je wuslědk dweju předstajenjow duchowneho oratorija Korle Awgusta Kocora „Israelowa zrudoba a tróšt“ sobotu wječor w Chróšćanskej cyrkwi a wčera popołdnju w Drježdźanskej Křižnej cyrkwi. Wjac hač 120 spěwarkow a spěwarjow chórow Meja, Lipa a chóra Serbskeho ludoweho ansambla kaž tohorunja hudźbnicy orchestrow SLA a Drježdźanskeje Sinfonietty su zhromadnje ze solistami Romy Petrick (sopran), Brittu Schwarz (alt), Jensom-Uwe Mürnerom (tenor) a prof. Matthiasom Hennebergom (bas) pod cyłkownym nawodom intendantki SLA Judith Kubicec přemóžacy wukon pokazali a wjac hač 500 ludźom w Chrósćicach a dalšim wjac hač 300 w Drježdźanach wusahowacy wuměłstwowo-hudźbny wječor a popołdnjo wobradźili.