Młode pjero z wida fachowče

Dienstag, 30. April 2019
Artikel bewerten
(1 Stimme)
Mjez mnohimi gratulantami, kotřiž jubilarce prof. Luciji Hajnec (srjedźa) wjele zboža přejachu, běchu mjez druhim Jěwa-Marja Čornakec a Jurij Łušćanski z Maćicy Serbskeje kaž tež dr. Jana Šołćina ze Serbskeho instituta (wotlěwa).  Foto: SN/Maćij Bulank Mjez mnohimi gratulantami, kotřiž jubilarce prof. Luciji Hajnec (srjedźa) wjele zboža přejachu, běchu mjez druhim Jěwa-Marja Čornakec a Jurij Łušćanski z Maćicy Serbskeje kaž tež dr. Jana Šołćina ze Serbskeho instituta (wotlěwa). Foto: SN/Maćij Bulank

Profesorka na wuměnku Lucija Hajnec dźewjećdźesatnica

Serbska wědomostnica prof. Lucija Hajnec swjeći dźensa swoje dźewjećdźesaćiny. Hladajo na tule šwarnu ličbu profesorka na wuměnku lochko zdychnywši přeradźi, zo njeje „sprawnje prajene z tym ličiła, tajku starobu docpěć. Běchu tajke a hinaše časy, druhdy bě napinace, druhdy wužadace, hdys a hdys sym na tym dwělowała, zo swoje nadawki zmištruju. Přiwšěm je tajkile jubilej něšto rjane – dołhož sy čiły a swět kołowokoło rozumiš.“ W tym nastupanju je w lěće 1929 w Zdźěri rodźena dźowka wučerja Józefa Hajny woprawdźe dosć hibićiwa – dušinje kaž tež ćělnje. Na čitanjach w Budyskej Smolerjec kniharni ju často wuhladaš. Za Maćicu Serbsku a Zwjazk serbskich wuměłcow so wona dale angažuje. Zajimowana sćěhuje wona aktualne towaršnostne a kulturne wuwiće we Łužicy a zwonka njeje, při čimž kładźe wona wosebitu kedźbnosć na serbske aspekty. Dokładnje a swěru přečita sej tudyše nowinske publikacije a słucha Serbski rozhłós. Ani póndźelne wusyłanje za młodźinu Radijo Satkula njeje jej njeznate.

Veröffentlicht in Kultura
Bitte anmelden, um einen Kommentar zu posten

Anzeige