Kulturny rum Hornja Łužica-Delnja Šleska zakonske předpisy spjelnił

Rychbach (SN/bn). Kulturny konwent zaměroweho zwjazka Kulturny rum Hornja Łužica-Delnja Šleska je na swojim 144. posedźenju minjeny pjatk w Rychbachu (Reichenbach) wšitkim namjetam jednotliwych dnjowych dypkow jednohłósnje přihłosował.

Najwažniša změna je po přiměrjenju wukazow sakskeje statneje kenclije a noworjadowanja zarjadniskich předpisow z lońšeho 4. decembra loni resp. lětušeho 27. februara trěbna modifikacija zasadneje směrnicy kulturneho ruma. To płaći w prěnim rjedźe za nowelěrowanje paragrafa V wo „wašnju a wobjimje spěchowanja“. Nětko su „njepřidźělomne wudawki“ jasnje pomjenowane. K tajkim słušeja mjez druhim „pjenježne pokuty, dołžne danje, zarunanjakmany nadhódnotowy dawk, leasing, dary w hódnoće wjace hač 20 eurow a kóšty w zwisku z chabłacymi dewizowymi kursami“. Nimo toho bu narunanska pawšala za zarjadniske wudawki konkretizowana. Dale płaćiwej stej w tym nastupanju sadźbje 7 resp. 15 procentow, po nowej definiciji pak wučinja maksimalna suma 1 000 resp. 1 500 eurow.