Židźino (MeB/SN). Wosebity hósć mjeztym 33. wječorneho spěwanja pod měrowym dubom chóra Židźino běchu lětsa spěwarki a spěwarjo chóra Lipa z Pančic-Kukowa. Rynki na zhromadny koncert wćipnych připosłucharjow běchu wčera tak derje pjelnjene, zo městna ani njedosahachu. Cyłkaj zahajištej koncert z kanonom „Dona nobis pacem“. Tak wupřestrěwaštej so hižo wot započatka měr a zhromadny duch nad sobuskutkowacymi, připosłucharjemi a přirodu.

Je z dobrej tradiciju, zo dźakuje so chór Židźino při tej składnosći swojim darićelam a sponsoram za wšu podpěru w běžnym lěće. Z wulkim wjeselom móžachu wčera wječor prěni raz nowe e-piano zasadźić. Tola prjedy hač wone zaklinča, přepodachu srjedźołužiscy hosćićeljo wotežki dirigentce Lipjanow Jadwize Kaulfürstowej. Pančičansko-Kukowscy spěwarjo mějachu sep serbskich a słowakskich štučkow, mjezynarodnych klasikarjow kaž tež šlagrow přihotowanu. Němski spěw, kotryž so wokoło ptačeho kwasa wjerći, šěrješe mjez připosłucharjemi wosebje dobru naladu.