Dobra bilanca hrajneje doby Němsko-Serbskeho ludoweho dźiwadła

Budyšin (SN/CoR). Z 35 wupředatymi předstajenjemi 24. Budyskeho lětnjeho dźiwadła skónči so předwčerawšim, njedźelu, tež wuspěšna hrajna doba Němsko-Serbskeho ludoweho dźiwadła. Nimale 35 100 přihladowarjow dožiwi inscenaciju „Na krótšim kóncu Słónčneje aleje“ pod hołym njebom na Budyskim hrodźe. Nimo toho witachu nimale 1 100 hosći na 14. Budyskich filmowych nocach. Dohromady je w sezonje 2018/2019 wjace hač 150 900 wopytowarjow 908 zarjadowanjow NSLDź widźało.

Wo nowy rekord postara so klankowe dźiwadło. Dohromady 413 předstajenjow pokazachu nimale 30 000 přihladowarjam wot staroby dweju lět w Budyšinje, w kulturnym rumje Hornja Łužica-Delnja Šleska, w Drježdźanach a na Němskim jewišću w madźarskim Szekszárdźe. Bě to něhdźe 3 300 přihladowarjow a 46 předstajenjow wjace hač w minjenej hrajnej dobje.