Wot prezentacije ansamblow srjedźoeuropskich krajow k poskitkam z pjeć kontinentow

Ličbu třinaće mnozy njelubuja, dokelž maja ju za ličbu njezboža. W prěnim julij­skim tydźenju smy, njehladajo na njeluboznu ličbu, XIII. mjezynarodny folklorny festiwal „Łužica 2019“ w Budyšinje, Hochozy a předewšěm w Chrósćicach, wuběrnje a wjesele woswjećili. Krasny swjatk folklory a zhromadnosće mjez ludami bě wulkotny wuspěch a rekord wopytarjow porno předchadźacym festiwalam. Sam běch třinaty króć jako wopytowar a předewšěm nowinar na tutym swjatku, sym wo nim rozprawjał a jón publicistisce sobu přihotował. Móžu tuž přirunać a wobkrućić, zo bě chwa­lobne hódnoćenje předsydy Domowiny Dawida Statnika a předsydy přihotowan­skeho komiteja Marka Kowarja prawe. 22 000 hosći njebě dotal na žanym fe­stiwalu. Wuměłcy z dwanaće krajow su lětsa zahorjenym přihladowarjam krasne a pisane dožiwjenja skićili.