Rada Załožby za serbski lud ma nětko wo wulkoprojektach 2020 rozsudźić
Budyšin (SN/CoR). „Telko próstwow w tajkich financnych dimensijach njejsmy dotal dóstali. Hewak bě jich přeco mjenje“, rozłožuje zastupjerka direktora Załožby za serbski lud Michaela Mošowa. Posledni termin wotedaća próstwow za klětuše projekty, za kotrež je požadana suma wyša hač 10 000 eurow, bě 31. julij. Nětko předleži Załožbje za serbski lud dohromady 30 próstwow za wjetše projekty 2020, nimo toho stej tež prěnjej dwě za mjeńše dóšłoj. „Rjenje je, zo wobsteji telko zajima so angažować. Na tamnym boku je prašenje, hač móžemy wšitkim přećam wotpowědować. Wšako su hospodarske srědki tež klětu wobmjezowane. Tuž ma załožbowa rada priority spěchowanja sadźeć.“ Tuchwilu přihotuja hospodarski plan za lěto 2020, kotryž ma załožbowa rada na nazymskim posedźenju wobzamknyć. Překwapjena Michaela Mošowa bě, zo je hižo spěchowana institucija próstwu za přidatny personal wotedała. „To dotal hišće njebě“, praji zastupjerka załožboweho direktora.