Miłoćicy (SN/CoR). Šulerjo 10. lětnika Kulowskeje wyšeje šule „Korla Awgust Kocor“ z wólbnym předmjetom wuměłstwo su wčera w Miłočanskej skale hižo zaćišć dóstali, kajke móhli lětuše wuslědki Mjezynarodneje rězbarskeje dźěłarnički być. Dźesać wuměłcow z Němskeje, Čěskeje, Ruskeje, Słowjenskeje a Bołharskeje dźěła tu hižo wot 19. awgusta na swojich projektach, kotrež chcedźa zjawnosći na swójbnym swjedźenju přichodnu njedźelu předstajić.

Hač wulki metalowy „Stražnik potajnstwow čłowjeka“ Petra Gerycha z čěskeje partnerskeje gmejny Njebjelčic Hlučína, nawody studija za rězbarjenje a design na Wuměłstwowej wysokej šuli Ostrava, zornowcowy „Templ časa“ Hermanna Schneidera z Awstriskeje abo metalo-zornowcowa twórba „Pěskowy časnik“ Willija Selmera z delnjołužiskeho Łaza (Laasow) – impulsow za rozmyslowanje maš tam dosć a nadosć. A rjanosć, kotruž kamjenjećesarjo kaž Ariel Štrukelj ze Słowjenskeje, Bernhard Männel z Drježdźan abo Čech Robert Alger ze spjećiweje maćizny domjaceho zornowca zdobywaja, sej wóčko lubić da.