Budyšin (SN/CoR). Nowe rjadowanja přizjewjena kompozicijow pola němskeje awtorskeje towaršnosće za hudźbne twórby GEMA k zawěsćenju awtorskich prawow je k wulkim iritacijam mjez serbskimi komponistami wjedło. Jako chcyše Měrćin Weclich njedawno swój nowy oratorij „Hrodźišćo“, kotryž změje přichodny tydźeń prapremjeru, pola GEMA jako serbskorěčnu twórbu přizjewić, bu přesłapjeny. Štož bě dotal ze wšitkimi swójskimi serbskimi spěwami sčinił, naraz hižo njefungowaše. „Dyrbju w internetnje podatej ,masce‘ wšitke pola porjadnje wupjelnić, hewak njehodźi so formular wotpósłać. Pod polom ,Sprache‘ su rěče podate. Dotal bě tam tež ,sorbisch‘ na wuběr. Wotnětka pak hižo nic“, Měrćin Weclich praji.