Dobra kombinacija tradicije a moderny

Ćisk (SiR/SN). Na Ćišćanskej nawsy móžachu minjeny kónc tydźenja zajimcy zbliska a zdaloka pisany miks stareho rjemjesła, serbskeje kultury a wašnja žiwjenja kaž tež spěwanja, rejow a kulinariskich burskich receptow dožiwić. Poradźena kombinacija z tradicije a moderny je mnohich wopytowarjow přiwabiła a zahoriła.

Kak stare ratarske a dalše mašiny funguja, kak „słodźi“ zašłosć, jako wowka hišće warješe, kotre potajnstwa skića lěs a jeho wobydlerjo a što ma Texas ze Serbami činić? Na kóždym z cyłkownje sydom wobdźělenych Ćišćanskich dworow su hosćo indiwidualnu abo temje wotpowědnu wotmołwu našli.