Budyšin (SN/bn). Serbski ludowy ansambl je nowy rjad „Zynki a linki“ zahajił. W srjedźišću zarjadowanjow stejitej literatura a hudźba serbskich wuměłcow, předstajenej wot instrumentalistow SLA kaž tež zwonka Łužicy skutkowacych serbskich dźiwadźelnikow. Wčerawšu premjeru na wupředatej žurli Budyskeje Röhrscheidtoweje bašty wuhotowachu znaty hrajer Stanisław Brankačk a dujerski kwintet Marie-Luise Fryčowa na fleće, Ralf Sarodnick na obowje, Tobias Witke na klarineće, Tereza Kratka na fagoće kaž tež Bernd Neffe na róžku.
Intendantka SLA Judith Kubicec wita hosći w bašće a rozłoži skrótka zakładnu mysličku noweho rjadu. „Telko rjanych knihow a tak mało časa za čitanje – z toho je wurostła ideja, literaturu raz na hinaše wašnje sposrědkować. Nastupajo teksty wobrubjacu hudźbu sym sej skerje rědka hrate kompozicije serbskich komponistow za komorne wobsadki wupytała“, intendantka rjekny.
