Aktualne palace temy ćežišća na lětušej 145. schadźowance byli
Budyšin (SN/bn). Na kopatej połnej žurli wulkeho domu Němsko-Serbskeho ludoweho dźiwadła je sobotu něhdźe 400 wopytowarjow 145. schadźowanku dožiwiło. Budyske jewišćo bě druhi raz z hosćićelom zetkanja studowacych, absolwentow, maturantow kaž tež hosći, mjez druhim z Čěskeje.
Pod nawodom najprjedy Symana Hejduški a po nim Michała Donata zahaji projektny chór studentow, podpěrany wot wjacorych hóstnych instrumentalistow, wječor ze spěwom „Circle of life“ z musicala „Kral lawow“. Dalšej přinoškaj cyłka běštej „Vois sur ton chemin“ Bruna Coulaisa a „Ha widźu-li ptačata ćahnyć“ Handrija Zejlerja. Zhromadnje z publikumom zanjesechu na kóncu spěw „Ženje tak rjenje njej’ było“.
