Přihotuja hnydom dwě wustajeńcy wo našim ludźe na Hradčanach
Budyšin (SN/CoR). Telko w serbskej misiji po puću być, kaž sej to kooperaciske projekty Budyskeho Serbskeho muzeja tele dny poprawom žadaja, to direktorka Christina Boguszowa scyła njezmištruje. Minjeny štwórtk wotewrěchu w Zagrebskim Etnografiskim muzeju wustajeńcu „Janko Šajatović Krabat a chorwatske gardy w Europje“ ze serbskimi požčonkami, před tydźenjomaj je wona w Celovecu na wotewrjenju třikrajoweho projekta „Wobrazy krajiny – Přechod“ była, a 17. januara bě w Praze. Wšako chcedźa tež w čěskej stolicy ludźom serbsku kulturu bóle zbližić.