W Americe je runje tak kaž w Madridźe lěto přebywał, dlěje hač lětdźesatk w Berlinje dźěłał a nětko nawróći so Syman Pětr Cyž do Łužicy – jako přichodny jednaćel Ludoweho nakładnistwa Domowina. „Sym wjele nazhonjenjow we wjacorych firmach a krajach a na medijowym swěće zběrał. Pozicija w LND mi nětko zmóžni, je najlěpje na dobro Serbow nałožować“, 42lětny mandźelski a nan dweju holcow rozłožuje. Swójba hižo wot lońšeho julija we Worklecach bydli. Na tamnišej šuli chodźi młódša dźowka do 2. lětnika, tamna do 5. lětnika Serbskeho gymnazija Budyšin. „Bě nam wažne, zo wonej serbsce čitać a pisać nawuknjetej.“ Na Serbskim gymnaziju bě „Budyski hólc“ a „Lejnjanski młodźenc“ tohorunja šuler – a je so jako tajki we wěstym zmysle tež do serbskich hudźbnych stawiznow zapisał. Wšako su tam 1995 skupinu Awful Noise załožili. W njej je na gitarje hrał, spěwał a teksty pisał. Mjeztym „móže hudźba tróšku mjechša być“. Wšako pisa Syman Pětr Cyž tež dźěćace spěwy za dźowce, kotrež wonej, nic naposledk k wjeselu nana, na swójbnych swjedźenjach přednošujetej.