Slědźerski projekt wo času politiskeho přewróta

Budyšin/Drježdźany (SN/CoR). Pod hes­łom „Serbske kulturne a kreatiwne hospodarstwo w transformaciji“ wobdźě­łuje dr. Theresa Jacobsowa wot spočatka februara w Serbskim instituće tři lěta trajacy projekt, kotryž je dźěl wot sakskeho ministerstwa za wědomosć, kulturu spěchowaneho zwjazowaceho projekta „Mul­tiple transformacije – towaršnostne nazhonjenja a kulturna změna we wuchodnej Němskej a wuchodnej Europje do a po lěće 1989“. Na projekće wobdźělenej stej nimo serbskeho slědźenišća a ko­ordinowaceho Instituta za sakske stawi­zny a ludowědu w Drježdźanach tež tamniši Institut Hannyh Arendt za slědźenje wo totalitarizmje a Leibnizowy institut za stawizny a kulturu wuchodneje Europy w Lipsku. Tute slědźenje wo politiskim přewróće sćěhuje tohorunja wot Swobodneho stata Sakskeje financowany projekt „1918 – Chiffre für Umbruch und Aufbruch“, w kotrehož wobłuku wěnu­jetaj so dr. Jana Piňosová a Marcel Langer hišće hač do kónca lěta předstawam wo serbskej Łužicy spočatk 20. lětstotka.