Sakska je Kamjensku Boršć za zwjazkowy zapis imaterielneho kulturneho ­namrěwstwa nominowała. Město ­Ka­mjenc a Spěchowanske towarstwo Boršć stej požadanje zapodałoj, kónc ­lěta ma konferenca kulturnych ­ministrow krajow rozsudźić.

Drježdźany/Kamjenc (SN/CoR). „Kamjenska Boršć je ze swojimi wjace hač 300 lětami stawiznow jedyn z najwjetšich šulskich a domizniskich swjedźenjow Sakskeje. Na wosebite wašnje steji za tradiciju a naroki. Runje w časach kaž nětčišeje koronakrizy sej wuwědomjamy, kajki wosebity wuznam žiwe tradicije našeho kulturneho herbstwa za našu regionalnu identitu maja. A nadźija je žiwa, zo móže so Boršć bórze zaso ze z kwětkami a chorhojemi pyšenym swjedźenskim ćahom přewjesć“, rozłožuje sakska kulturna ministerka Barbara Klepsch (CDU).