Na 10. zetkanju łužiskich filmowcow nowe projekty předstajili

Wulke Hendrichecy (SN/CoR). Něhdźe 25 ludźi z filmoweje branše a kreatiwneho hospodarstwa je so wčera na prěnim dnju internetneje dźěłarnički Serbsko-němskeje filmoweje syće Łužycafilm wobdźěliło. Poprawom měješe so znowa wot Załožby za serbski lud spěchowane 10. zetkanje łužiskich filmowcow we wobłuku Nysoweho filmoweho festiwala (NFF) wotměć, štož pak koronakrizy dla móžno njebě. Digitalna premjera je so přiwšěm poradźiła.

Strategije za dalše wuwiće łužiskeho filmowstwa běchu prěnja tema, konkretne filmowe projekty su popołdnju předstajili. Rěčnik syće Erik Schiesko moderěrowaše dopołdnišu diskusiju, kotraž bě wusměrjena na tři ćežišća: filmowy fonds za Łužicu, filmowe stejnišćo Łužica a zaměry za přichodne pjeć lět filmoweje syće, kotraž zhladuje w nowembrje na pjećlětne wobstaće.