Wot spočatka junija su wuměłcy SLA w krótkodźěle
Budyšin (SN/CoR). Tež, hdyž w někotrych wobłukach towaršnostneho žiwjenja mjeztym nowa korona-normalita knježi, na wuměłskim polu tomu hišće dawno tak njeje. Serbski ludowy ansambl tučasnje hišće žane programy njepokazuje. Přiwšěm wuměłcy w małych formacijach zwučuja. Balet rejuje we wobsadkach hač do štyrjoch rejwarjow. Po probje baletnu žurlu rjedźa a desinficěruja. Tež hudźbnicy w małych skupinach zwučuja, a to z trěbnym wěstotnym wotstawkom. Chórisća su dotal doma zwučowali, móža pak to wot tohole tydźenja tež zaso w rumnosćach ansambla. Při spěwanju je strach najwjetši, zo so wirus rozpřestrěwa. Hygienu nastupajo wuwichu ansamblowcy plan, kotryž je strowotniski zarjad přizwolił. Po nim so nětko maja.
