Projekt „Čiń sobu!“ na dobro serbskeje hudźbneje kultury nałožili
Budyšin/Zły Komorow (CRM/SN). Jazzowa hudźbnica Walburga Wałdźic, rodźena Worklečanka a skutkowaca předewšěm we wobkruhu na hudźbne tradicije kaž tež awantgardistiske hibanja bohateho Lipska, je srědki ze spěchowanskeho fondsa „Čiń sobu!“ za wuměłsce wurjadne koncertne předstajenje serbskeho ludowohudźbneho namrěwstwa pod titulom „Spěwy z brunicowych kónčin“ zasadźiła.
Z projektnym žónskim komornym chórom, wobstejacym přewažnje z hudźbnje sylnje angažowanych Serbowkow a klasisce wukubłanej a zdobom na nowe směry sylnje nastajenej pólskej wiolinistku Izabelu Kałduńskej, poradźi so jej minjenu sobotu na swjedźenskej žurli Budyskeho Serbskeho muzeja a njedźelu w Złokomorowskej Serbskej cyrkwi profesionelna nowa interpretacija wosom delnjołužiskich a ze Slepjanskich kónčin pochadźacych serbskich ludowych pěsnjow, a to stajnje w originalnej rěči. Tak nawjaza wona zdobom na tučasne a přichodne dalše razne přestrukturowanje tohole serbskeho etnikuma.