Wosom dźiwadłow z Němskeje a Sewjerneje Irskeje chce so předstajić

Budyšin (SN/CoR). 3. festiwal „Witajće dru­hdźe“ přihotuje Budyske Němsko-Serbske ludowe dźiwadło za dny wot 17. do 20. septembra. „Titul je wědoma witanska formula, z kotrejž NSLDź jeno swoju wotewrjenosć nastupajo transkulturnu zhromadnosć njesignalizuje, ale tež cyle konkretne dźiwadłowe projekty z cyłeje Němskeje“, wottam rěka. Nimo na NSLDź nastachu na sydom němskich měšćanskich a statnych dźiwadłach projekty młodych ludźi k temje „Přećiwo wšěm mjezam“, w kotrymž so wobdźělnicy „z integraciju a migraciju jako zakładnymaj wuměnjenjomaj a wužadanjomaj europskeje towaršnosće kaž tež z naratiwami wo mjezach splahow a z regionalnymi identitami rozestajeja“. Z Němskeje wobdźěla so ze swojimi lajskimi skupi­na­mi Dźiwadło Kamjenica, Statne dźiwadło Drježdźany, Mnichowske komorne hry, Dźiwadło a orchester Heidelberg, Dźiwa­dło nad rěku Ruhr a Němske dźiwadło Berlin. Nimo toho witaja ze Sewjerneje Irskeje cyłk Dylan Quinn Dance Theatre.