Bilanca hrajneje doby NSLDź z nimale połojcu mjenje přihladowarjow

Budyšin (SN/CoR). Z němskej premjeru činohrajneho studija „Greta“ na zahrodźe Němsko-Serbskeho ludoweho dźiwa­dła Budyšin je so wčera wječor hrajna doba­ 2019/2020 zakónčiła. Bě to wose­bita, wot koronapandemije postajena sezo­na. Jeje dla su wšitke předstajenja wotsrjedź měrca do meje wupadnyli. Tež lětnje dźiwadło dyrbjachu wotprajić. Město­ toho wuhotowachu prěni raz nowy format „lětnje dźiwadło na dźiwadłowej zahrodźe“, kotryž je něhdźe 1 500 wopyto­warjow na 32 předstajenjach přiwabił. Dohromady je 78 550 ludźi zarjadowanja NSLDź wopytało – w hrajnej dobje­ 2018/2019 bě jich ze 151 000 ludźimi nima­le dwójce telko.