Tomaš Žur na „Budyskim pišćelowym lěću“ koncertował

Kóždu srjedu wječor wotměwa so wot 3. junija w Budyskej tachantskej cyrkwi hač do kónca awgusta „Budyske pišćelowe lěćo“. Mjeztym njeposkićichu jenož wurjadni hudźbnicy z Němskeje koncerty na wulkich byrglach firmy Eule, ale tež z New Yorka a Prahi. Wosebje pak za­hori njedawno Tomaš Žur, wjelelětny tachantski organist w Berlinje, mnohich wopytowarjow z přewšo naročnym programom. Mnozy Serbja z města a wokolnych wosadow koncert jako wurjadny podawk dožiwichu, tak tež jeho bywši sobušulerjo z tehdomnišeje Budyskeje Serbskeje rozšěrjeneje wyšeje šule.