Kulturny konwent wo nowej směrnicy za spěchowanje diskutował

Zhorjelc (SN/CoR). Hišće do wobzamknjenja dnjoweho porjadka je Žitawski wyši měšćanosta Thomas Zenker (njestronjan) wčera diskusiju w kulturnym konwenće Hornja Łužica-Delnja Šleska zahajił, kotruž budźe gremij – a hladajo na financne konsekwency tež komuny – hišće dlěši čas, znajmjeńša pak přichodne lěto, dale zaběrać. „Ćerń we wočach“ bě jemu předposledni dypk dnjoweho porjadka, z kotrymž chce kulturny konwent institucionelne spěchowanje wot lěta 2022 hinak rjadować. Tamne temy su po tymle zazběhu mjenje abo bóle spěšnje wothóčkowali – mjez druhim prašenje, kak ze spěchowanski pjenjezami za zarjadowanja wobchadźeć, kotrež su koronapandemije dla wupadnyli abo kotrež su přestorčili. W tychle padach chcedźa rozrisanje namakać, kotrež próstwarjow dale njewobćežuje.