Budyšin (CS/SN). We wobłuku Interkulturneho tydźenja wotmě so minjenu wutoru w Budyskim Kamjentnym domje dialog w rjedźe „Žro pudla“. Na podiju diskutowachu nimo moderatorki Ireny Janiw wokrjesna społnomócnjena za wukrajnikow Anna Piętak-Malinowska, Hamida Taamiri ze Syriskeje a Vietnamjanka Dang Thi Ngoc Yen. Zaměr bě wuslědźić, kak so ludźo z migraciskim pozadkom w Budyšinje čuja a kajke problemy kaž tež přeća woni maja.

Anna Piętak-Malinowska bydli hižo 30 lět w Němskej, 15 z toho w sprjewinym měsće. Wona so wjeseli, zo móže mjeztym jako kruće přistajena społnomócnjena wokrjesa za nowopřichadźacych skutkować. Přiwšěm přeje sej wjace inwesticijow do witanskeje kultury. Wobdarjenosće kóždeho jednotliwca su potencial, kotryž so hišće přemało wužiwa. Idealne by było, indiwiduelne integraciske plany nastajić. To by so dołhodobnje wudaniło. „Njemóžemy sej dowolić witansku kulturu ignorować“, wona rjekny.