30. Choćebuski filmowy festiwal hišće hač do kónca decembra online

Choćebuz (SN/CoR). Hłowne myto 30. Choćebuskeho filmoweho festiwala (CFF) w kategoriji hrajneho filma doby ruski režiser Iwan I. Twjerdowskij za film „Conference“ (Ruska, Estiska, Italska, Wulka Britanska 2020). W nim reflektuje wón braće zastajencow w Moskowskim dźiwadle Dubrowka w lěće 2002. Je to třeći króć po filmomaj „Corrections Class“ (2014) a „Zoology“ (2016) zo dósta Twjerdowskij skulpturu „Lubinu“. Z wosebitym mytom za najlěpšu režiju počesćichu Piotra Domalewskeho z Pólskeje za film „I never cry“. Dźiwadłowi debitanća Marijana Novakov, Tijana Marković a Valentino Zenuni z filma Ivana Ikića „Oasis“ (Serbiska, Słowjenska, Nižozemska, Francoska, Bosniska-Hercegowina 2020) wjesela so nad mytom za wusahowace předstajenje. Sobotu wječor su dobyćerjow CFF na digitalnym mytowanju wozjewili. Dohromady přewostajichu wu­znamjenjenja w hódnoće 72 000 eurow, mjez druhim tež dobyćerjam w kategoriji krótko- a młodźinski film. „Smy přemóženi wo přewšo pozitiwnym wothłosu, kotryž lětuši program nastupajo žnějemy.