W Mułkecach dźěćetko jako drjewjana skulptura wjesnjanow a wopytowarjow zawjesela

Wćipnosć wone wodnjo budźi, zakuzłace pak je wječor a w nocy. Při starej Mułkečanskej šuli w Slepjanskej wosadźe wot prěnjeho adwenta rězbarjena skulptura Mułkečanskeho Božeho dźěćetka wobydlerjow a wopytowarjow zawjesela. „Smy prosće bjezrěčni, smy hordźi“, dźiwa so gmejnski a wjesny radźićel Ingo Herschmann hladajo na wuslědk. W sprócniwym filigranym dźěle je Slepjanski drjewowy wuměłc Thomas Schwarz z 200 lět stareho duboweho zdónka Mułkečanske dźěćetko a dwě přewodźerce stworił. „Štom steješe prjedy při hońtwjerskim hrodźe, eksaktnišo prajene při Zelenej šćežce pola duboweje zahrody. W awgusće smy sej z Mułkečanskej wjesnej radu drjewo wuzwolili. W oktobrje sym dźěłać započał“, Schwarz powěda. Skulpturu financować poradźi so dźakowano spěchowanju přez krajnu pawšalu za sylnjenje wjesneho ruma. Elvira Rathner z towarstwa Kólesko je wuměłca barby, muster a typiku Mułkečanskeho dźěćetka nastupajo wustojnje poradźowała.