Runočasnje z hornjoserbskej Protyku wuńdźe loni kónc septembra delnjoserbska „sotra“ Pratyja. Na 160 stronach su přinoški 35 awtorow rozdźělneje staroby, k tomu přińdźe 16 stron z nawěškami. W srjedźišću tematiki steji tónkróć wjes Běła Góra. Wo sydlišću mjez Bórkowami a Tšupcom zhoni čitar tójšto stawizniskeho, ale ze słowom a wjele fotami tež wo dźensnišim žiwjenju, wo pěstowanju serbskich nałožkow. We wsy bydlaca rozhłosownica Marion Stenselowa pisa, zo běchu nacije 1937 Běłu Góru na Geroburg přeněmčili (Serb hnydom na markhrabju Gera mysli, kiž bě serbskich wjednikow morił). Gmejnscy radźićeljo pak su sej nazymu 1945 hnydom zaso staroserbske mjeno wudobyli.