Inscenaciju wo Strittmatteru předstajeja we wopomnišću basnika

Bóšojce (SN/MiR). Złokomorowske Nowe jewišćo poskića tuchwilu přewšo njewšědnu inscenaciju, a to w Bóšojcach (Bohsdorf). Přewažnje němskorěčnu ­produkciju „Ganz anders wer: Erwin Strittmatter“ wobohaćeja serbskorěčne dźěle, słowo a hudźba. Mjez akterami je Wolfgang ­Kotisek. Prěni króć w swojim žiwjenju hraje nimale 70lětny sobu w inscenaciji Noweho jewišća Zły Komorow. Režiser Frank Düwel z Hamburga, kiž je zdobom awtor, festiwalny nawoda, dźiwadłowy producent a docent, je swobodnje po motiwach a wosobach romana ­Erwina Strittmattera „Klamy“ kruch napisał a za njón profijow kaž tež lajkow angažował. Zapřijeć chcył je wón tohorunja serbski aspekt. Wšako bě wowka wnukej Erwinej swój čas na puć dała, zo ma na serbskosć hordy być. A Stritt­matter zwuraznja, zo njemóže so spě­wanju dawnych maćerjow w sebi dowobarać (Gegen den Gesang der Urmütter in mir komme ich nicht auf).