Prěnje swětowe mišterstwa w Pismikowej kekliji ze snadnym wuslědkom

Budyšin (SN/bn). Filip Budar je prěni „swětowy mišter w Pismikowej kekliji“. Ze swojimaj zbytnymaj pismikomaj zamó sej wón titul w poslednjej sekundźe zawěsćić, wutworjejo interjekciji „eh“ a „ah“. Z dohromady 177 dypkami přesćahny wón kontrahentow Bosćana Naw­ku (175) a Michała Nuka (168). Poprawom z wulkim wotstawkom wodźacy Stefan Cuška (221) bu regulatiwej wot­powědnje diskwalifikowany – jako čłonej swětowe mišterstwa wuhotowaceho towarstwa Škit njesmědźachu jemu hłowne myto přizwolić. Tak wjeseleše so Budar jako nowy champion nad sto eu­rami; jemu na podesće slědowacymaj hrajerjomaj přepodachu dobropisaj za Budyski hosćenc „Wjelbik“ resp. za Smolerjec kniharnju.