Na CFF zhladuje sekcija „Domizna“ do zašłosće a hibićiweje přitomnosće

Choćebuz (SN/CoR). Z hommage za loni w decembrje zemrěteho nestora serbskeho filma dr. Tonija Bruka su wčera popołdnju w Choćebuskim kinje Gladhouse sekciju „Heimat – domownja – domizna“ 31. Choćebuskeho filmoweho festiwala (CFF) zahajili. Wuzwoliła bě kuratorka sekcije dr. Grit Lemke tři filmy, kotrež wšelakorosć tworjenja Bruka wotbłyšćuja: W pasku „Wopyt“ (NDR 1984) inscenuje wón tekst Bena Budarja, w kotrymž staruška wo swojim žiwjenju powěda, „Zornowc“ (1985) jako „snano jedyn z najbóle filmiskich dźělow Bruka“, kaž Lemke wuzběhny, zwjazuje poetiske wobrazy z tekstomaj Jurja Brězana a Kita Lorenca. W za „Łužyca TV“ 1996 za RBB produkowanej dokumentaciji „Serbski Barliń“ předstaji wón tehdy čiłe serbske žiwjenje w němskej stolicy, kotraž ma sama serbske korjenje. Je to zdobom zasowidźenje z wosobinami kaž Mětom Pernakom, Alfredom Krawcom a tehdyšimi studentami, kotřiž su dźensa znaći akterojo serbskeho swěta.