„Šěrcec Hanka“ publikum jako historiska rekonstrukcija přeswědčiła
Budyšin (SN/CoR). Stejo je publikum z hrimotacym přikleskom sobotnu prapremjeru „Šěrcec Hanka“ w Budyskim Němsko-Serbskim ludowym dźiwadle mytował a sobuskutkowacym trójnu „Sławu“ zanjesł. Na wupředatej žurli witaše zastupjerka intendanta za serbske dźiwadło Madleńka Šołćic jako čestnych hosći awtora nowele „Židowka Hanka“ z lěta 1963 Jurja Kocha, dźensnišu mějićelku bywšeho Šěrcec statoka Jěwu-Mariju Elic kaž tež wobsedźerku Lipšćanskeho nakładnistwa Hentrich & Hentrich dr. Noru Pester, kotraž bě před lětomaj němsku wersiju nowele wudała.
