Před połdra lětom su Hórnikečansku Energijowu fabriku jako sakski industrijowy muzej znowa wotewrěli. ­Najebać koronu móža tam na wuspěšnu prěnju bilancu zhladować.

Hórnikecy (SN/CoR). Jenož 16 dnjow bě Energijowa fabrika Hórnikecy po wote­wrjenju w oktobrje 2020 hač do kónca lěta přistupna, loni bě tomu pjeć měsacow, w kotrychž su dohromady 12 235 hosći witali. „Rezonanca wopytowarjow je jara dobra. Hosći překwapjeja ležownosć, jónkrótnosć awtentiskeje fabriki a wulkotna architektura“, praji nawodnica muzeja Kirstin Zinke a dodawa, „přeco zaso so dźiwam, hdyž ludźo měnja, zo su kulturne zarjadnišća zwonka metropolow mjenje moderne, zo njejsu tak aktualne a do přichoda wusměrjene a su špatnišo nastajene hač w městach. To bohužel za cyłu Łužicu płaći. Rady sobu pomhamy, tónle negatiwny stereotyp korigować.“