Zapiski „Kralowskeje huslerskeje knihi“ w načasnym błyšću zaklinčeli
Budyšin (SN/bn). Tak mjenowana „Kralowa huslerska kniha“ drje je najstarša zběrka serbskich ludowych a rejowanskich melodijow, pochadźaca z druheje połojcy 18. lětstotka. Tónle zapis tworješe wobsahowe žro třidnjowskeje dźěłarnički „LAB 1 – Laboratorij za tradicionalnu serbsku hudźbu“ Serbskeho ludoweho ansambla, w kotrejež wobłuku sej dohromady dźewjeć hudźbnikow minjeny kónc tydźenja cyłkownje pjeć sadźbow nadźěłachu. Wčera prezentowachu wobdźělnicy wuslědki w Budyskim Kamjentnym domje.
