Prapremjera inscenacije z historiskim kaž tež aktualnym pozadkom

Chrósćicy (mg/SN). Korony dla je so hakle z třećim zazběhom poradźiło, zo měješe hra „Mór a lubosć“ – projekt Towarstwa Cyrila a Metoda – minjenu sobotu skónčnje swoju prapremjeru. W Chrósćicach pod hołym njebjom na farskej łuce je při bohudźak suchim wjedrje něhdźe 500 přihladowarjow jednanju wo zachadźenju „čorneje smjerće“ w Hornjej Łužicy a Chróšćanskej wosadźe w 15. lětstotku sćěhowało. Awtorka Jěwa-Marja Čornakec je hru składnostnje 600. róčnicy załoženja Chróšćanskeho Bratstwa swj. Bosćana spisała.