Swjatočne spožčenje Myta Zejlerja informatikarjej Witej Bejmakej

Łaz (SN/bn). „Je mi wulka česć a wulke wjeselo, Witej Bejmakej Myto Zejlerja tu we Łazu, hdźež bě wuznamjenjenju mjeno spožčacy basnik a farar wjele lět skutkował, přepodać směć. Wón je sobu jako prěni spóznał, zo ma serbšćina jeno přichod, je-li tež digitalnje prezentna, štož je so mjeztym na tójšto runinach zwoprawdźiło. Serbska rěč a kultura wobohaćatej Łužicu a Saksku hižo přez lětstotki. Dyrbimy sej stajnje znowa wuwědomić, kotru nadhódnotu z tym mamy. Dźakuju so jury za wuběrny rozsud, dźakuju so wšěm, kotřiž wuwiwanju a šěrjenju serbšćiny přinošuja a dźakuju so z cyłeje wutroby Witej Bejmakej z respektom a připóznaćom za to, zo je serbšćina dźensa digitalnje přistupna.“ Z tymle słowami gratulowaše statna ministerka Barbara Klepsch (CDU) ze sakskeho ministerstwa za wědomosć, kulturu a turizm lětušemu lawreatej z 5 000 eurami dotěrowaneho myta wčera we Łazowskej ewangelskej cyrkwi.