Wuspěšna prapremjera spěwohry „Z Tobu – Bohu swjećene lěto“

Chrósćicy (SN/bn). Cyła žurla wupředateje wjacezaměroweje hale „Jednota“ tworješe jewišćo za prapremjeru kaž tež slědowacej předstajeni spěwohry „Z Tobu – Bohu swjećene lěto“ w Chrósćicach. Wjace hač 140 sobuskutkowacych – přewažnje dźěći a młodostni w starobje wosom do 14 lět – předstajichu minjeny pjatk prěni raz inscenaciju, wotbłyšćowacu wjerški cyrkwinskeho lěta a za Łužicu typiske nabožne kaž tež folkloristiske nałožki, w formje rewijoweho musicala po ideji a koncepciji Sabiny Lanzyneje a Marcela Hozy, kotryž bě zdobom zhromadnje z Měrkom Brankačkom režiju wukonjał. Přihladowarjo dźakowachu so akteram ze sylnym přikleskom a trójnej „Sławu“ za něhdźe třihodźinski spektakl, wopřijimacy hraty sceny, solistisce kaž tež w chórje zanjesene spěwy a reje.